TAJÊ komxebata xo de ya ke Şingal de organîze kerde, veng da seba xelinsyîşê cinîyan êzidîyan ke Fermanê 74. de ameyî esîrgirewtene wa xebatî bêrê xurtkerdene. Vervatoxa TAJÊ Rihane Hesen vat, “Azadîya ma pabesteye azadîya esîranê ma ya.”
Têgêrayîşê Azadîye yê Cinîyan ê Êzidîyan (TAJÊ) bi şîarê “Seba edalet û azadîye to zî bibe vengê esîran” Şingal de komxebate organîze kerd. Komxebate de seba azadkerdişê esîran ke Qirkerdişê Êzidîyan û 2014î de ameyî esîrgirewtene û xurtkerdişê têkoşînî ame vengdayene.
Vervatoxa TAJÊ Rihan Hesene bale ante ser ke meseleya esîran 12 serrî yo nêameya çareserkerdene û vat, “Dişmenî waşt êzidîyan bi rayîrê cinîyan çîn bikero. La cinîyan xoverdayîş aver berd û fermanî ameyî betalkerdene.” Rihane îfade kerd seba xelisnayîşê esîran ganî her kes berpirsîyarîye bigêro xo ser û vat “Azadîya ma pabesteye azadîya esîranê ma ya.”
Fermandaranê Yewîyanê Cinîyan ê Şingalî (YJŞ) ra Vîyan Hebabî zî îfade kerd ke cinîyê êzidîyan badê fermanî dest pê xopawitişî kerd û vat, “Hinî çew nêeşkeno îradeyê ma rê hukim bikero. Ma cinîyê verê fermanî nîyê. Ma xo çînbîyayîşî ra xelisna.” Hebabî vat xelisnayîşê esîran berpirsîyarîya ehleqî û wîjdanî yê pêro cinîyan a.
Endama Akademîya Jineolojî ya Şingalî Cîhan Celoyî zî îfade kerd ke qirkerdiş têna kiştişê însanan nîyo, cehdkerdiş çînkerdişê vîrê tarîxî û estbîyayîşê şarêkî yo û vat, “Ma vera Fermanê 74. xover da, ma do tim xover bidê.”
Vervatoxa Yewîyanê Pawitişê Cinîyan (YPJ) Ruksene Mihemed zî komxebata TAJÊ rê ke bi waştişê xelisnayîşê cinîyan ê êzidîyan ama viraştene, mesaj şawite.
Ruksene Mihmed vat: “Xelisnayîşê cinîyan ê êzidîyan têna seba YPJyî têna sîyasî nê, eynî wextî de wezîfeyo însanî û ehleqî yo. Têkoşîn do dewam bikero. Mihemed vîstîvîrî ke aqibetê xeylê cinîyan nîno zanayene û vat, “Cinîyê ke aqibetê înan nîno zanayene, ma do bixelisnê, ma heme cinîyan ke kewtî destê çeteyanê DAÎŞî bixelisnê.”
Mihemede bale muhîmîya xorêxistinkerdiş û xoserqerargirewtişê cinîyan ser û vat dewaya cinîyan ê êzidîyan dewaya hempare ya heme cinîyan a.
