Stenbol de qezayanê Maltepe, Esenyurt, Fatih, Sultanbeyli û Bagcilar de seba şehîdanê têkoşînê azadîye programê vîrardişî ameyî viraştene.
Bi rayberîya MEBYA-DER’î ya Stenbolî, seba şehîdanê Têkoşînê Azadîye ya Kurdîstanî ke tarîxan û cayanê cîyayan de cuya xo ra bîyî, qezayanê Maltepe, Esenyurt, Fatih, Sultanbeyli û Bagcilar de programê vîrardene ameyî viraştene. Keyeyê şehîdan, Dayîkê Aştîye, endam û rayberê partîyanê sîyasîyan, temsîlkarê sazgehanê sîvîlan û zaf welatîyî tewrê şînî bîyî. Salona vîrardene de serê masayan de fotografê şehîdan, yê Rayberê Şarê Kurdî Abdullah Ocalanî û gulî ameyî ronayene. Salona vîrardişî de pankartê ‘Ma şehîdanê rûmetî bi hurmet yad kenî’, ‘Şehîdê ma rûmetê ma yê’, ‘Têkoşînê înan rayîrê ma roşn kena’ û ‘Şehîdî Nêmirenî’ ameyî daleqnayene.
Programê vîrardişî yê seba şehîdan bi deqîqeyêke rêzgirewtişî dest pêkerd.
Badê rêzgirewtişî sînevîzyono ke behsê têkoşînê şehîdan kerdêne, ame temaşekerdene.
‘Ma deyndarê şehîdan ê’
Badê sînevîzyonî keyeyanê şehîdan qisey kerd û dîyar kerd ke ê deyndarê şehîdan ê û wina ame vatene: “Eke ewro dewlete rêxistine reyde muzakere kena bi sayeya şehîdan o, û ê deyndarê şehîdan ê. Bi sayeya şehîdan ma nika tîya de yê. Înan semedê ma canê xo feda kerd. Canê ciwanî soz da û tewrê têkoşînî bîyî. Ma zî soz danî ke ma do peyê dewaya înan de bî. Rayîrê înan rayîrê ma yo.”
Badê qiseykerdişan mewlûd ame wendene.
