Şalûlê keskî (Merops apiaster) ke hema vajê neslê înan kêmî bîyo, dormeyê Bendawa Devegeçîdî ya Amedî de bi hawayêko komî ameyê vînayene. Fotografkar Veysî Arcagok fotograf û vîdeo şalûlan belge kerd.
Verê vatêne Kurdîstan ca û warê şalûlan û bilbilan o. Labelê serranê peyênan de hema vajê vakurê Kurdîstanî de neslê şalûlan yan zî şalûlê keskî nêmendê.
Labelê seba ke zimistano vîyarte bi varan vîyart û tesîrê xo wisarî ser o kerd, na rewşe bîye sebeb ke reyna zaf tewirê teyran û heywananê bînan şaristanê Vakurê Kurdîstanî de ameyê vînayene. Şalûlê keskî ke hema vajê cayê sey Amedî de nêyenê vînayene, emser reyna vejîyayî meydan.
Fotografkarê belgefîlmanê xoza Veysî Arcagok o Amedij; dormeyê Bendawa Devegeçîdî ya qezaya Peyasî de rastî şalûlan ame û fotografê înan antî. Fotografkar o ke nameyê ey vîyarto, dormeyê bendawe de fotograf û vîdeo yê şalûlan bi komî antê û dîyar kerd ke şalûlî reyna agêrayê cografyaya dormeyê Amedî. O vano ke bi vînayîş û antişê fotoğraf û vîdeoyanê nê şalûlan zaf sereberz û keyfweş o. Fotografkar vano ke tewirê nê şalûlan dormeyê Amedî de zaf kêmî yênê vînayene.
