Şaredarîya Amedî ya Şaristanê Girdî bi projeyê “Atolyeya Muzîkî ya Gerok” ke hetê Konservatuvarê Şaristanî yê Aram Tîgranî ra yeno amadekerdene, gedeyanê dewan bi mûzîk û hunerî ano têhet. Gedeyê ke dewanê Arzoxlî û Zorava yê Sûrî 3 hewteyo nê perwerdeyî vînenê, amadekarîya konserê hewteyê çarina kenê.
Serekîya Daîreya Kultur û Karanê Komelî ya Şaredarîya Amedî ya Şaristanê Girdî, seba destek dayene tewrbîyayîşê gedeyan ê beradişê hunerî xebatanê xo yê “Atolyeya Mûzîkî ya Gerok” dewan de domnena. Çarçewaya programê ke verê cû dewanê Farqîn, Sûr, Rezan û Hêni de amebî rayraberdene, gedeyê bi hetkarîya antrenoranê pispor xebatanê mûzîk û rîtmî kenê, enstrumanan nas kenê û bi boyaxkerdişê kaxidanê girdan tecrûbeyê berardişê kolektîf musenê.
Hedreyîya konserî dewam kena
Kêfweşîya tewr girde ya gedeyan nika dewanê Arzoxlî û Zorava yê qezaya Sûrî de xo dano mojnayene. Şaredarîya Amedî bi perwerdeyê naskerdişê enstrumanan, ezberkerdişê deyîran û performansê serê sehneyî hewteyo 3. apey verda. Gedeyê ke keyeyê xo de deyîran ezber kenê û bi heyecan tewrê dersan benê, hedreyîya xo ya seba konserê girdî ke do peynîya hewteyê çarina de taxa înan de bêro viraştene temam kenê. Gedeyê ke tewrê perwerdeyî bîyê Mina Guger, Semanur Karakaş û Fatma Eren kêfweşîya xo arde ziwan û dîyar kerd ke ey raya verêna ke deyîranê wina musenê, keye de tekrar kenê û bi heyecanêko gird hêvîyêke vejîyê seheyî ser.
‘Eke ma wayîrê yewbînî nêvejîyê kes wayîrê ma nêvejîyeno’
Welatijanê dewe ra Xanê Toprak zî bale ante muhîmîya nê xizmetî ser û vat: “Ma wazenê gedeyê ma çîyanê winayînan bimusê û ma qîymet danê na xebate. Gedeyî mamosteyanê xo ra heskenê û mîyanê xo de embazîya mûzîkî kenê. Eke ma ewro wayîrê yewbînî nêvejîyê kes wayîrê ma nêvejîyeno.”
Goreyê programê Şaredarîya Amedî ya Şaristanê Girdî, xebatanê atolyeya yê seba gedeyan do 28ê temmuze de dewa Tile, 29ê temmuze de dewa Tûte ya Licê û 4-5ê tebaxe de zî dewanê Qozan û Qerebaşe yê Sûrî de dewam bikerê.
