Serokê Meclisê Numan Kurtulmuş derbarê hevdîtinên bi partiyên siyasî re diyar kir ku wan ji bo di navbera partiyên siyasî de li ser qanûna çarçoveyî lihevkirinek çêbibe hevdîtin pêk aniye û wiha got: “Hêvî dikim partiyên siyasî jî di demeke zû de xebatên xwe biqedînin û beriya Meclis bikeve batlaneyê vî karî biqedînin.”
Serokê Meclisê Numan Kurtulmuş derbarê hevdîtinên qanûna çarçoveyî yên bi partiyên siyasî re li Meclisê daxuyanî da.
Numan Kurtulmuş bi bîr xist ku Komîsyona Meclisê li ser lihevkirina partiyên siyasî raporek amade kiribû û wiha got: “Li vir metneke hevpar jî hat amadekirin. Ew yek pir girîng bû. Îradeya bêçekbûnê û bi xebatên komîsyonê hevpariyek pêk hat. Ji bo bêterorbûna Tirkiyeyê hewcehiya bi qanûnan derket holê. Berpirsyarî ya partiyên siyasî ye. Em hêvî dikin ku weke rapora komîsyonê hemû partî li ser qanûnan jî mutabakat bin. Ji bo wê jî me bi partiyên siyasî re hevdîtin pêk anî. Di xala 6an a rapora me de jî li ser rêxistinê me çi gotibû dê cih bigire. Yanî ew qanûn dê demkî be û dê derbarê xwefesixkirina rêxistinê de be.”
‘Beriya Meclis bikeve batlaneyê dê qanûn derkeve’
Numan Kurtulmuş destnîşan kir ku qanûn dê nebe qanûna efûyê û wiha axivî: “Ev qanûn dê nebe qanûna efûyê. Ev qanûn ji bo ku endamên rêxistinê çekan deynin û werin Tirkiyeyê û faliyetên xwe bi dawî bikin e. Di hevdîtinan de jî li ser fikra partiyan yekbûnek heye. Em dikevine demeke nû ku têkoşîn tenê bi siyasetê bibe. Ya girîng ew ê ku em biratiyê ava bikin. Ji hemû deman zêdeetir pêwistiya me bi biratiyê heye. Piştî teror ji holê rabû em ê hê xurt bibin. Hêvî dikim partî jî xebatên xwe demildest bi dawî bikin û Meclis beriya bikeve batlaneyê qanûnê derbixe û piştre bikeve batlaneyê.”
‘Wê di navbera partiyan de mutabakatek bê kirin’
Numan Kurtulmuş li ser pirsa rojnamegeran diyar kir ku CHPê jî piştgiriyeke xurt daye û heke Ozgur Ozel partiyeke nû ava bike dikarin dîsa piştgiriya wan bigirin. Numan Kurtulmuş li ser pirsa rojnamegeran careke din diyar kir ku beriya Meclis bikeve batlaneyê ew ê vî karî biqedinînin û got: “Partî dê werin cem hev û li ser mutabakatê bikin û mekanîzma dê çawa bibe, dema xwe dê çawa bibe diyar bikin. Dê metneke kurt bibe. Mekanîzmayên çavderiyê yên dewletê dê raporên xwe pêşkeşî Meclisê jî bikin. Di navbera partiyan de dê muzakereyek bê kirin û piştre jî metna qanûnê dê bê amadekirin. Ev polîtîkaya dewletê ye û em ê Tirkiyeyeke beteror ava bikin.”
