Yûsûf Guler û embazanê ey pîya Mamekîye de Komela Zon û Kulturê Dêsimî kerda ya û seba ke ziwan û kultur vîndî nêbo cehd kenê. Veng dano vano: “Kam ke zonê xo ra hes keno, destê xo bikero bînê kemere. Berîme peser, zone xo qisey bikerime.”
Yûsûf Guler o ke weşîya xo Dêrsim de rameno, Unîversîteya Mûnzûrî de beşa Zazakî xelesna û 2015 ra na hetêrî yo ke terba embazanê xo binê nameyê Komela Zon û Kulturê Dêsimî de seba ziwan û kultirê şarê xo kar keno. Yûsûf Gulerî ajansê ma rê derheqê kar û xebatê înan o ke serê ziwan, îtîqat û kulturî yo qisey kerd.
‘Qîymetê zonî bizanime’
Yûsûf Guler, seba kar û xebatanê xo wîna vano: “Ma Komela xo 2015 de kerde ra. Ma waşt ke nameyê Komela ma Komela Sey Qajî bo, dewlete nêverda ma nê nameyî bidim ci. Tepîya ma nameyê Komele vûrna û kerd Komela Zon û Kulturê Dêsimî. Zerê jû serre de ma xeylî kar kerd. Seba zon muşnayene û qiseykerdene embazê ma ameyî komele û rind vêrd ra. Seba zon, kultur, govende û pîya qiseykerdene ser yenîme telewe. Vazenîme ke zonê xo ra wayîr vejîme. Komela ma kultûr û îtîqatê ma ra wayîr vejîyayene ser weşîya xo ramnena.”
‘Zonê xo ra hes bikerîme’
Yûsûf Gulerî, qiseykerdîşê xo yê peyenî ca da heskerdene û wayîr vejîyayena ziwanî ser û wina vat: “Kam ke zonê xo ra hes keno, destê xo bikero binê kemere. Berîme peser, zonê xo qisey bikerime. Xortê ma, domanê ma zonê xo bizanê. Şarê ma gegene vanê ke, zonê xo çira qisey bikerîme? Zonî ra kewtê durî û hewce nêvênenê ke zonê xo qisey bikerê. Zonê xo bê qîymet vênenê. Henî nêbeno. Qîymet bidime zonê xo, îtîqat û kulturê xo. Bê zon, bê îtîqat bê kultur nêbeno. Nê pêro kî zaf muhimê.”
