Hunermendo kurd û Dêrsimij Mikaîl Aslan weşanayîşê fotografanê dardekerdişî yê Seyîd Riza û embazanê ey ser o hesabê xo yê medya dîjîtal de mesajêk weşana.
Hunermend Mikaîl Aslanî semedê weşanayîşê fotografanê dardekerdişî yê Seyîd Riza û rayberanê Dêrsimî de, hesabê xo yê medya dijîtal ser o mesajêk weşana û wina vat: “89 serrî ra tepîya can û cesedê sima ma dîyî, keleberbî nîyîme! Serebercîya sima û canfedayîya sima reyna ame çimanê ma ver, keleberbî nîyîme! Tenê dêyax bî, adirê zerrê ma bî serdin!
‘Hey derdê ma yo bêderman’
Hey derdê ma wo bêderman! Vilê ma de hebin û layê sêpîyan. Seyîdê ma yê bêgor û bêkefen’. Dirbeta azerîyayî ya se serran. Nê resimê sima pistinê ma der ê. Heq zano ke ma keşî nêkîsenîme, kîsten a kî bese nêkenîme hêfê xo bîcîme. Cilikê şîyayî danîme xo ra, dûgel bi dûgel fetelînîme. Derdê cîgera xo heta Olî Dîwanî benîme. Zengel danîme piro, mezelanê sima viracenîme. Tarix û nîsan ser ra nusnenîme. Çilawa momine vêsnenîme, ebi nîyaz û gulbangî helalîya xo wazenîme.
Teberikê sima azê xo ra vila kenîme, îşte a roce, Ma hêfê xo sima ra cênîme!”
