Anqara – Badê Zîrweya NATO’yî nika bale prosesê Aştî û Komelê Demokratîk ser o ya. Yeno pawitene ke hewteyo ameyoxî de do averşîyayîşê muhîmî virazîyê û reyna yeno pawitiş ke Heyetê DEM Partî ê Îmralîyî şêrê Girawa Îmralîyî û Rayberê Şarê Kurdî Abdullah Ocalanî reyde pêvînayîş bikerê û derheqê qanûnê çarçewayî de zî averşîyayîşê neweyî virazîyê.
Prosesê Aştî û Komelê Demokratîk ke rojevo bingeyîn ê Vakurê Kurdîstanî û Tirkîya de, paweyê averşîyayîşanê muhîmî yê. Badê Zîrweya NATO’yî ya ke 7-8ê temmuze de, Anqara de ame viraştiş, yeno pawitene ke do çarçewaya prosesî de averşîyayîşê muhîmî virazîyê. Nîqaşo bingeyî ê prosesî; qanûnê çarçewa yê. Qanûnê çarçewaye ser o xeylî nîqaş û xeberî yenê vîlakerdiş. Nîqaşo bingeyî ê qanûnê çarçewayî ser o no yo ke Rayberê Şarê Kurdî Abdullah Ocalanî reyde bêro nîqaşkerdiş û bi no hawa bêro rojevê Meclîsî. Sewbîna yeno vatiş ke ganî qanûnê çarçewayî seba heme gerîlayanê Têgêrayîşê Azadîye derbasdar bo, cîyayî nêkero mîyanê gerîlayan Têgêrayîşê Azadîye.
Çimê raya pêroyî Meclîsî de yo
Serekê Meclîsî Numan Kurtulmuş eşkerayîya xo de dîyar kerd ke qanûnç çarçewayî do nêbo qanûnê efûyî. Rayberîya Têgêrayîşê Azadîye Kurdîstanî zî naye ser o eşkerayîyêk da û waşt ke qanûnê çarçewaye bêrê viraştiş û stratejîya Abdullah Ocalanî bero caardene. Heto bînî ra zî Heyetê DEM Partî ê Îmralîyî ke nêzdî 50 rojîyo Rayberê Şarê Kurdî Abdullah Ocalanî reyd pêvînayîş nêkerdo, no zî rojevo bingeyî ê sîyasetê demokratîkî yo. Yeno pawitene ke hewteyo ameyoxî de averşîyayîşê muhîmî virazî. Serrgêra vêşnayîşê çekan ê Prosesê Aştî û Komelê Demokratîk de, çimê raya pêroyî zî Meclîs û eştişê gamanê qanûnî yê de yo.
‘Eke qanûnê çarçewayî sey ke ameyê muzakerekerdiş nêro rojev, do problemî vejîyê’
Rayedarê DEM Partî dîyar kerd ke taslaxê qanûnê çarçewayê ke yeno qalkerdiş, 24ê gulane de Rayberê Şarê Kurdî Abdullah Ocalanî reyde ameyo muzakerekerdiş û goreyê muzakereyî ganî qanûn mîyanê gerîlayanê Têgêrayîşê Azadîye de cîyayî nêvirazo, seba heme gerîlayan derbasdar bo.
Sewbîna rayedarê DEM Partî îqaz kerd û vat ‘eke qanûnê çarçewayî sey ke ameyê muzakerekerdiş nêro rojev, do vernîya prosesî de problemî vejîyê’. Rayberîya Têgêrayîşê Azadîye Kurdîstanî zî eşkereyîya xo de dîyar kerd ke eke qanûnê çarçewayî, statuyê Rayberê Şarê Kurdî Abdullah Ocalanî garantî nêkero, ê do nê çî qebul nêkerê û îqaz kerd ke eke qanûnê çarçewa bi no hawa bêro ê do vera nê helwestê xo bimojnêra.
Prosesî de hewteyêko krîtîk
Ame zanayîş ke hewteyê vernîyê ma de do taslaxê qanûnê çarçewayî şêro verê destanê partîyanê sîyasî û do taslax bêro nîqaşkerdiş. Badê nîqaşan do taslax hetê Heyetê DEM Partî yê Îmralîyî seba tesdîqkerdişî Rayberê Şarê Kurdî Abdullah Ocalanî şêro Girawa Îmralîyî û Abdullah Ocalanî reyde bêro nîqaşkerdiş. Yeno pawitene ke do badê nê nîqaşan qanûnê çerçawayî bêro rojevê Meclîsî.
