Amed – Şilîya bêmabêne ya ke Amed de varena, heme şaristan de cuya rojane ser o tesîrêko gird kerd. Awa ke kuçe û cadeyan de pêser bîya, kêmanîya binawanîye reyna arde verê çiman. Ramitoxan trafîk de zehmetî dîye. Peyayî zî rayîranê ke bîyî sey golanê awe ra bi zehmetêka pîle vîyartî.
Şaristanê Amedî de şilîya bêmabêne ewro zî dewam kerd û serê cuya şaristanî de tesîr viraşt. Wextêko kilm de tayê cade û çatrayîrî binê awe de mendî. Seke vîdeoyanê ma de zî aseno, rayîrî awe ra pêçîyayî. Erebeyî heta çerxanê xo awe mîyanê de mendî û trafîk giran bî.
Hemwelatîyan ra waştişê binawanîye
Ronişte û esnafê herême vanê ke her rey ke şilîye varena, ê eynî manzara vînenê. Înan nêrazîbîyayena xo eşkera kerde. Peyeyan vat ke rayîran ra vîyartene zehmet bîyo. Ê kar û barê xo yê rojaneyî de zehmetî vînenê.
Seba çareyî aqilo pêroyî û mudaxeleya lezabez hewce yo
Seba ke verê nê problemanê şaristanî bêro girewtene, ganî îdareyê herêmî xebatê pakkerdiş û newekerdişê binawanîye û rogaran lezabez bikero. Ganî şaredarî bitaybetî verê mewsimê zimistanî mazgal û xetanê kanalîzasyonî de xebatêka pîle ya pakkerdiş û rindkerdişî bikero.
