Amed – Bi pêşengîya Wendekaranê Komunalîstan bi sloganê ‘Bi kampusanê komunbîyayeyan dem demê rêxistinbîyayîşî yo’ Çand Amed de konferansêk yeno viraştiş. Konferans de ame dîyarkerdiş ke prosesê 27 serran yê esîrgirewtişê Rayberê Şarê Kurdî Abdullah Ocalanî hîkayeyêka zaf bierje ya ciwanîye ya û no çî 27ê sibate de reyna xo mojna.
Bi pêşengîya Wendekaranê Komunalîstan Merkezê Kongreyî yê Çand Amedî de bi sloganê ‘Bi kampusanê komunbîyayeyan dem demê rêxistinbîyayîşî yo’ konferansêk yeno viraştiş. Salona konferansî de fotografê Rayberê Şarê Kurdî Abdullah Ocalanî û pankartê sey “Seba unîversîteyanê komunalan nika dem demê cinîye yo”, “Xeta cinîye, xeta cuye”, “Ma wendekarê komunalîstî ser fikr û ramananê Bendê Çubukî yê” ameyî dardekerdiş. Dayîkê Aştîye, Parlamenterê DEM Partî yê Amedî Serhat Erenî û ciwanê wendekarî yê ke Vakurê Kurdîstanî û Tirkîya ra ameybî, tewrê konferansî bîyî.
Konferans seba cangorîyanê azadîye bi deqîqeyêk rêzegirewtiş û wendişê sirûda “Çerxa Şoreşê” dest pêkerd. Ciwanan dem bi dem sloganê “Bijî Serok Apo”, “Şehîdî Nêmirenê” û “Jin Jiyan Azadî” berz kerdî.
Nameyê Wendekaranê Komunalîstan ra Hasan Karsuyî qisey kerd; dima aktîvîsta TJA’yî Nesrîn Akgule qisey kerd. Badê qiseykerdişan sînevîzyonêk ame mojnayîş û mesajê ke konferansî rê ameybî erşawitiş ameyî wendiş. Dima konferans çapemenîye rê padaye dewam kerd.
‘Ma bawer kenê ke konferans do bibo sebebê çîyanê rindan’
Hasan Karsuyî da zanayîş ke demêkê winasî de ganî sey wendekaranê komunalan xo rêxistin bikerê û komelêko komunal awan bikerê û wina vat: “Demêko winasî de ke serdestîya camêrdî û kapîtalîzmo kiştox est o, ganî ma êdî xo bi komunalîzm rêxistin bikerê û sîstemê kapîtalî rê firsend nêdê. Amancê ameyîşê ma yê têhet bi nê konferansî no yo. Ma bawer kenê ke no konferans do ma rê bibo sebebê zaf çîyanê rindan.”
‘Ma zî do cesaret bikerê ke bivurîyê û bivurnê’
Aktîvîsta TJA’yî Nesrîn Akgule dîyar kerd ke no konferans destpêkêk o û xala destpêkî tim merdiman rê hedefêk ronena û wina vat: “Şarê kurdan no musayîş Têgêrayîşê Apoyî ra girewt; do tarîx de wina bimano. Ewro no têgêrayîş xalêka newe ya destpêkî de yo. Ma qerardar ê ke na xala destpêkî ra bi îdealanê girdan dewam bikerê. Wexto ke mi şima dî, ez newe ra ciwan bîya. Ma hîna bi heyecan û serberz bîme. Bi nê moralî ma bi heyecan bîme ke têkoşînî hîna gird bikerê. Rayber Apo cayêk de vindeno û vano ‘Ez tim ciwan a’. No çîyêko komelkî yo ke raştîya bîyolojîke ra zî vîyareno. Wexto ke mi şima ra ewnîya, mi zî xo ra persa: ‘Ciwanî senî do ser bikewo ke tim ciwan bimano?’ Prosesê 27 serran yê esîrîya Rayber Apoyî hîkayeyêka zaf bierje ya ciwanîye ya. No çî bi 27ê sibate reyna xo mojna. Têgêrayîş û komel bi meraq, endîşe û hîsanê neweyan newe ra ciwan kerdî. Rayberêkê şarî bi heme şertanê tecrîdî zî senî ciwan mend? Tu kes çin o ke qasê Rayber Apoyî vera dogmatîzmî têkoşîyayo. Ma zî do cesaret bikerê ke bivurîyê û bivurnê. Metersê, vajê ‘Ma do ser bikewê’. Astengî est ê, ma zanenê. Profîlêko newe yê ciwanan û yê komelî est o. Dewreyê xoserîye de nimûneyêko gird yê cesaretî est bî. Ma do vajê ke ma do ser bikewê, ma do ser bikewê, ma do ser bikewê.”
