Adana – Çarçewaya tehqîqatê vera Şaredarîya Çukurova de Şaredar Emrah Kozay û Şaredaro verên Soner Çetîn zî tede 34 kesî ameyî girewtiş; 15 kesî zî bi qerarê kontrolê edlî ameyî veradayîş.
Serdozgerîya Komare ya Adana bi maneya “dizdîya îhaleyan” vera Şaredarîya Çukurova ya Adana tehqîqatêk dabî destpêkerdiş. Çarçewaya nê tehqîqatî de 19ê teşrîna verêne de vera Şaredarîya Çukurova operasyonêk ame kerdiş. Serdozgerîye derheqê 51 kesan de qerarê destbendkerdişî dabî. Operasyon de Serekê Şaredarîya Çukurova Emrah Kozay, Şaredaro verên Soner Çetîn û 4 cagirê şaredarî zî tede 49 kesî ameybî destbendkerdiş.
Serdozgerîya Komare ya Adana derheqê operasyonî de îdia kerd ke karê şaredarîye de bêusulî ameya kerdiş û îhaleyan de dizdî ameya tesbîtkerdiş. Goreyê serdozgerîye, operasyon bi îdîayanê “awankerdişê rêxistine seba sucdarîye”, “endamîya rêxistine”, “rişwet” û “dizdîya îhaleyan” ame kerdiş.
Badê ke karê 49 kesan Fermandarîya Cendirmeyan a Adana de qedîyayî, ameyî sewqkerdişê dadgehe. Badê îfadeyanê destbendkerdeyan dadgehî derheqê 34 kesan de ke Şaredar Emrah Kozay zî tede yo, qerarê girewtişî da; 15 kesî zî bi qerarê kontrolê edlî ameyî veradayîş.
Çarçewaya tehqîqatî de cigêrayîşê 2 kesan dewam keno.
