Amed – Hemserekê SES’î yê Amedî Mehmet Nur Ulusî binpaykerdişê heqanê nêweşan û problemanê Nêweşxaneyê Dewlete yê Selahaddîn Eyyûbî yê Amedî ser o qisey kerd û wina vat: “Hem Wezîrê Weşîye hem zî Mudirîya Weşîye ya Amedî raşteraşt berpirsîyar ê û ganî bi lezabez gamanê laziman bierzê.”
Nêweşxaneyanê Amedî de hacetan ra bigîre heta pakîye zaf problemê bingeyênî est ê û no zî beno sebebê binpaykerdişê heqê weşîye yê şarî. Çend rojan ra ver Nêweşxaneyê Dewlete yê Selahaddîn Eyyûbî yê qezaya Yenîşehîrî ya Amedî de semedê varanî banê beşê ameliyatxaneyî ra awe dilopîyaye û nêweşxane de ameliyatî nêameyî kerdene. Coka nêweşê ke ganî bi lezabez ameliyat bibîyêne, ameyî sewqkerdene nêweşxaneyanê bînan ê Amedî. Hemserekê Şûbeya Sendîkaya Kedkaranê Xizmetanê Komelkî û Weşîye (SES) ya Amedî Mehmet Nur Ulusî problemanê nêweşxaneyan ser o ajansê ma rê qisey kerd.
‘Pêşnîyazê persan erşawîyayî Meclîsî la hema cewab nêameyo dayene’
Mehmet Nur Ulusî bale ante resayîşê xizmetê weşîye yê Amedî ser o: “Hetê emnîyet û weşîye ra problem û tehlukeyê zaf girdî est ê. Amed merkezêko muhîm o la seba ke xizmetêko raşt û merdimane bêro pêşkêşkerdene ganî hem awanîyê nêweşxaneyan hem zî hacetê înan yê tibî weş û bêkêmanî bê. Heyf ke nê kêmanîyî mudetêko derg o ke dewam kenê. Ma sey SES’î nê tehlukeyî dîyî û seba haydarkerdişê raya pêroyî xebatî kerdî. Ma bi rayîrê parlamenteran pêşnîyazê persan erşawitî Meclîsê Tirkîya û cewab waşt. La heta ewro tu cewabêko fermî nêameyo dayene.”
‘Bi bahaneyê teserufî xebat û restorasyonî ameyî tehîrkerdene’
Mehmet Nur Ulusî wina vat: “Taybetî badê erdlerzê 6ê sibate ma persa ke awanîyê Nêweşxaneyê Selahaddîn Eyyûbî û Nêweşxaneyê Domanan erdlerzêko muhtemel de do xo ver bidê yan ney. La ne Wezîrê Weşîye ne zî Mudirîya Weşîye ya Amedî cewab da. Herundeya çareserîye de bi bahaneyê ‘tedbîranê teserufî’ xebat û restorasyonî ameyî tehîrkerdene.”
‘Wezîrê Weşîye û Mudirîya Weşîye ya Amedî berpirsîyar ê’
Mehmet Nur Ulusî da zanayene ke semedê varanê zafî Nêweşxaneyê Selahaddîn Eyyûbî de awe dilopîyaye: “Hewcedarîya verêne û bingeyêne ya merkezanê weşîye sterîlîzasyon û pakî ya. Wexto ke felaketêko winasî beno, nêweşxane herundeya tedawîye de bi xo bena çimeyê nêweşî û enfeksîyonan. Semedê nê laserî û çinbîyayîşê emnîyetî ameliyatê nêweşan ameyî betalkerdene. Wexto ke nêweşî yenê sewqkerdene nêweşxaneyanê bînan, barê înan giran beno û lîsteyê pawitişî derg benê. Zanistê tibî de prensîbêko pîroz est o: ‘Nêweşî rê zerar mede.’ La qerar û xemsarîya nikayine raşteraşt cuya hemwelatijan kena binê tehlukeyî. Coka hem Wezîrê Weşîye hem zî Mudirîya Weşîye ya Amedî raşteraşt berpirsîyar ê û ganî bi lezabez gamanê laziman bierzê.”
