Serekê PSK’yî Bayram Bozyelî dîyar kerd ke qederê her çar parçeyanê Kurdîstanî yewbînan ra girêdaye yo û vat: “Kes bi xo çiqas bihêz bo wa bibo bê yewîye nêşêno ser bikewo. Çunke mesele meseleya yew partî nîya, meseleya yew miletî ya.”
Prosesê Aştîye û Komelê Demokratîkî ke Rayberê Şarê Kurdan Abdullah Ocalanî 27ê sibate 2025î de da destpêkerdene, dewam keno. Proses bi “Qanûnê Çarçewa” kewt merheleyêka newîye; pawîyeno ke Meclîsê Emnîyetê Neteweyî (MGK) 27ê teşrîna peyêne de reyna kom bibo û derheqê qanûnî de qerar bido.
‘Ganî dewlete gamanê şênberan bierzo’
Bayram Bozyelî dîyar kerd ke çiqas ke di serrî yo proses dest pêkerdo zî hetê dewlete ra gamê şênberî nêameyê eştene û vat: “Nameyê prosesî est o la tedeyîyê ci çin o. Tirkîya hewceyê demokratîkbîyayîş, aştîyêka raştikêne û çareserîya meseleya kurdan a. La Tirkîya proses sey ‘Tirkîya bêterore’ pênase kerd. Tirkîya de meseleya terorî çin a; meseleya kurdan û waştişanê şarê kurdan est a.”
Bozyelî ard ziwan ke ê çekverdayîşê PKK’yî cayê xo de vînenê la seba naye dewlete ganî gamanê şênberan bierzo: “Gerîlayê PKK’yî senî do agêrê, kesê ke sirgun de yê, senî do agêrê û êyê ke hepisxaneyan de yê, key do bêrê verdayene? Şarê kurdan wazeno ke ziwanê ey bibo ziwanê perwerdeyî û fermî û nasnameyê ey qanûnan de ca bigîro. Şarê kurdan eşkeno bê ke sînorê Tirkîya bivurîyo sîstemêkê federalî de xo bi xo îdare bikero.”
‘Aştî bê çareserkerdişê meseleya kurdan nêbena’
Bozyelî îfade kerd ke ewro bi hezaran sîyasetmedarê kurdan hepisxaneyan de yê û vat: “Heta ke meseleya kurdan çareser nêbo no sîstem roje bi roje ver bi rijîyayîş û zerarî şino û fatura ci şarê tirkan ser o birîyena. Ewro sebebê feqîrîya Tirkîya çareser nêbîyayîşê meseleya kurdan o. Coka aştî û demokrasîya Tirkîya çareserkerdişê meseleya kurdan ra girêdaye ya.”
‘Ma wazenê şarê kurdan ver bi azadîye şêro’
Bozyelî bale ante forumî ser o ke Hewlêr de ame viraştene û vat: “Waştişê yewîye mîyanê kurdan de xurt o; la heta ewro zaf cehdan netîce nêda. Qederê her çar parçeyanê Kurdîstanî yewbînan ra girêdaye yo. Ganî ma yewbînan qij nêvînê, destkewteyanê her çar parçeyan û têkoşînî rê hurmet bikerê. Ma wazenê ke şarê kurdan na rewşa tarîye peyê xo de verdo û ver bi azadîye şêro.”
