Colemêrg – Rojhelatê Kurdîstanî de tedayê vera welatîyan dewam kenê. Aşmanê peyênan de bi desan welatî bi behaneyanê cîya-cîyayan ameyî destbendkerdene û cayo ke tede vindarnîyenê eşkera nîyo. Serrêk de 67 tepîşteyê sîyasîyî hetê rejîmê Îranî ra ameyî dardekerdene.
Îran ewro merheleyêka tarîxê xo ya tewr qelse û xeternake ra vîyareno. Şero ke mabênê Îran û DYA-Îsraîlî de bi, sîstemê leşkerî û ekonomîkî yê Tehranî leqna. La Îran hetê mîyanneteweyî de çiqas ke bin kewena, hende zî polîtîkayanê xo yê zordarîye vera şarî û bitaybetî vera rojhelatê Kurdîstanî de huşkêr kena. Bitaybetî şaristananê sey Urmîye, Mehabad, Pîranşar, Bane, Sine, Seqiz û Kirmanşanî de şîdet bi şeklêko sîstematîk yeno ramitene. Rêjeya dardekerdişî Îran de resaya astêk ke 10 serranê peyênan de nêameya dîyene.
“Serrêk de 67 tepîşteyê sîyasîyî ameyî dardekerdene”
Goreyê melumatanê ke dezgehê komelê sivîlî yê rojhelatê Kurdîstanî KURD-PA arê dayî, Komara Îslamî ya Îranî mabênê 10ê teşrîna verêne ya 2025î û 10ê teşrîna verêne ya 2026î de tewr kêmî 67 tepîşteyê sîyasîyî darde kerdî. Na rêje nêzdîyê 9 qatê dardekerdişanê sîyasîyan ê 14 serranê vîyarteyan a. Raporî de dîyar bî ke rejîmê Îranî dardekerdişî êdî tena sey ceza ney, sey “hacetêkê sereke yê tersî” şuxulneno. Goreyê raporî, dadgehî bi behaneyanê bêbingeyan û demêko zaf kilm de qerarê dardekerdişî danê; cenazeyî nêdîyenê keyeyan; îtîrafê ke bi tedayan ameyê girewtene, televîzyonan de yenê weşanayene û tayê dardekerdişî meydanan de verê çimanê şarî de yenê kerdene. Rêxistine venga dezgehanê mîyanneteweyîyan da ke dardekerdişê Komara Îslamî bêrê vindarnayene.
“Kesê ke yenê destbenkerdene, heqê avûkatî ra bêpar mendê”
Rojhelatê Kurdîstanî de keyeyê aktîvîst, sporkar, hunermend û welatîyan yenê sereştene. Kesê ke yenê destbenkerdene, heqê avûkatî ra bêpar yenê verdayene. Keyeyî bi rojan, tayê reyan bi aşman nêzanê ke doman yan zî merdimê înan kamcîn zîndan yan zî merkezî de yê. Rojanê verênan ê destbenkerdişî de seba girewtişê “îtîrafanê bi zorî” îşkenceyê fizîkî û psîkolojîkî yê giranî yenê kerdene û tehdîtê kiştişî yenê dayene.
“Aktîvîst, sporkar, deyîrbaz”
Aktîvîst Faramaz Saedî yê Dehgolanî 6ê teşrîna verêne de bi teda û îşkence ame destbenkerdene; eynî wext de datîzayê ey Yadullah Moteî zî ame destbenkerdene. Hêzanê Pasdaranî 3yê teşrîna verêne de Şîrzad Çavşînî (35) yê dewa Verçekê ya Bane destbend kerd. Birayê ey Şîrko Çavşînî 27ê temmuza 2022î de sînorê Sartazînî de ame kiştene. Pasdaran 7ê teşrîna verêne de dewa Baulhasanî ya Bane de Xusrew Kerîmperî (34) destbend kerd. Eynî roje Bukan de Muhsîn Gerdîşî û birayê ey Huseyîn Gerdîşî ameyî destbendkerdene. Ferşad Rizayî yê dewa Zeferawanî ya Dewandere û Hasan Mistefa yê Bane 6ê teşrîna verêne de ameyî remnayene.
Aktîvîstê karkeran Nahîd Xodacu 5ê teşrîna verêne de ame remnayene. Hunermend û deyîrbaz Şoreş Ebubekir, ke Serdeşt de akademîya muzîkî ya “Avayî Kurd” awan kerdbî, 11ê teşrîna verêne de ame destbendkerdene. Seqiz de 8ê teşrîna verêne de hetê Pasdaran ra 7 kurdî, Abdullah Amînî, Rahîm Heqperest, Seyîd Mohammed Salih Huseynî, Mistefa Qaderî, Xalid Rahmî, Mihemed Kerîmpur û Huseyîn Abdullah ameyî destbendkerdene. Sporkar Cemal Ahmedî yê Sine zî 5ê teşrîna verêne de ame destbendkerdene. Cayê înan heme eşkera nîyo.
