Enqere – Endamê Heyetê Îmrali yê DEM Partî Mîthat Sancarî dîyar kerd ke pêdîyayîşê peyênî de Rayberê Şarê Kurdan Abdullah Ocalanî derheqê qanûnê çarçewa de israr kerdo ke ganî gamê duhetî û garantîya huqûqî bêrê caardene. Mîthat Sancarî vat ke ê aşma teşrîna verêne de averşîyayîşanê neweyan pawenê.
Prosesê Aştîye û Komelo Demokratîk, ke bi qanûnê çarçewa kewt merheleyêka newîye, bi hedrekerdişanê heyetan pawitişê ardişê qanûnî yo. Qanûn do dimayê qerarê tesdîq û tesbîtî yê Konseya Emnîyetê Neteweyî (MGK) bikewo merîyet. Pawîyeno ke MGK 27ê teşrîna peyêne de reyna kom bibo. Heyetê Îmrali yê DEM Partî, ke parlamenter Pervîn Buldane, Mîthat Sancar û avûkat Faîk Ozgur Erolî ra yeno pêser, Cagirê Serkomarî Cevdet Yilmaz, Serekê Meclîsî Numan Kurtulmuş û Serekê Pêroyî yê MHP’yî Devlet Bahçelîyî reyde pêdîyayîşî kerdî.
Mîthat Sancarî derheqê pêdîyayîşanê 13ê êlule de vat: “Birêz Ocalanî qanûn sey gamêka verêne ya ke rayîrê prosesî akena nirxnabî. Ey israr kerd ke cewabê aştîye ca verdayîşê çekan o, cewabê sîyasîbîyayîşî zî sîyasetê demokratîk û komelo demokratîk o. Nirxnayîşê ey yo bingeyin no bî ke qanûn tena bes nîyo, ganî gamê pratîkî yê dihetî û garantîyê huqûqî bêrê ca. Ey bale ante ser o ke ganî îradeyê aştîye vengîye de nêmano.”
Mîthat Sancarî dîyar kerd ke seba ke komare demokratîk bibo, ganî bi qanûnan qewetinkerdişê îdareyanê lokalan, qedînayîşê qayûman, garantîya huqûqî ya heqê ziwan û kulturî, perwerde û dezgehanê fermîyan de şuxulnayîşê ziwanê kurdkî, ardişê qerarê DMME yê derheqê tepîşteyanê sîyasîyan de û sîstemê hemserekîye bêrê garantîkerdene: “Heta nika ardişê qanûnê çarçewa û awankerdişê tayê heyetan gamê pozîtîf ê. La seba ke no binge qewetin bibo, ganî pratîkêko hîrayêr û îradeyêko qerardar bêro nîşandayene. Aştîya menda tena bi bername û pratîkêkê demokrasî yê hîrayêr û yewpare beno.”
Mîthat Sancarî vat ke ganî Birêz Ocalan prosesî de cayêkê merkezî û tesîrdarî de bo: “Ma israr kenê ke ganî no statuyêkê eşkera yo ke sey ‘Koordînatorîya Aştîye û Sîyasîbîyayîşî’ ameyo tarîfkerdene bo. La heta nika derheqê statu û şertanê xebata ey de qerarêko zelal nêvejîyayo. Ma derheqê pêdîyayîşanê rojnameger û akademîsyenan reyde zî averşîyayîşan pawenê. Teşrîna verêne seba prosesî merheleyêka krîtîk a. Gamêka şênbere hezar qiseyan ra hîna rind a.”
