Platformê Ked û Demokrasî yê Amedî serrgêra 11. yê Qirkerdişê Garê Ankara de qurbanî Goristanê Şehîdlik yê qezaya Yenîşehîr û Goristanê Yenîkoy yê qezaya Rezan de vîr ardê.
Endamê Platformê Ked û Demokrasî yê Amedî, karkerê înşaatî yê Sendîkaya Karkeranê Awanî û Rayîrî (Yapi Yol-Îş), keye û temsîlkarê rêxistinanê sivîlan amê têhet. Tewrbîyayoxan mezelê qurbanan zîyaret kerdî û qerenfîlî mezelanê Feyat Denîz û Abdullah Erolî ser ronayî. Zaf kesî tewrê vîrardişî bîyî.
‘Berpirsîyarî nêameyî muhakemekerdiş’
Hemverfekê yê Platformê Ked û Demokrasî yê Amedî Kazim Bozanî îfade kerd ke 11 serrî vîyartî zî seba muhakemekerdişê berpirsîyaran gamê şênberî nêameyî eştiş: “11 serran ra ver Ankara de, Qada Garê Trênî de, vera des hezaran merdiman hêrişêko wehşîyane ame kerdiş; nê merdiman seba qîrayîşê aştîye ameybî têhet. Nê hêrişî de heyf ke 103 embazê ma ganê xo ra bîyî. Bi desan embazê ma birîndar bîyî û seqet mendî. Ewro demêko ke behsê aştîya komelkî beno, ma vanê ke wayîrvejîyayîşê vîrê nê embazan wayîrvejîyayîşê aştîye yo. Sey Platformê Ked û Demokrasî ma reyna vanê ke do nê têkoşînî heta peynî dewam bikerê.”
‘Ma soz danê ke no têkoşîn do dewam bikero’
Hemserekê Odeya Mîmaran yê Amedî Şerefhan Aydinî zî bale ante têkoşînê aştîye yê qurbanan ser o: “Sebebê cigêrayîşê ma yê aştîye hîna gird beno û hîna lezabez beno. Vîrardişê înan gandarkerdişê têkoşînê înan o. Ganî ma dewa û cigêrayîşê înan yê aştîye dewam bikerê. Heta ke aştî bêro nê welatî, bêro nê erdan, ma soz danê ke no têkoşîn do dewam bikero.”
Vîrardiş bi rêzegirewtiş qedîya.
