Kitabo newe yê nuştox Çayan Okuducîyî, “Dengê Helbesta Kurdî”, Weşanxaneya Lîsî ra vejîya. Kitab neticeyê xebatêka 5 serran o û bale anceno averşîyayîşê şîîra kurdkî û rolê aye yê awankerdişê nasname û ziwanî ser o.
Edebîyatê kurdkî de kitabêko bîn zî ame weşanayene. Kitabê “Dengê Helbesta Kurdî” yê nuştox û şaîr Çayan Okuducîyî Weşanxaneya Lîsî ra vejîya. Kitab 190 rîpelî yo.
Kitab derheqê şîîra kurdkî ya modernî de analîzan pêşkêşê wendoxan keno. Kitab de Seydayê Cegerxwînî ra heta ewro eseranê şaîranê kurdan ser o erjnayîş û analîzê xorînî ca gênê. Okuducî şaîr û nuştoxêko diziwanin o. Bi eserê xo yo peyên reyde edebîyatê kurdkî de hîrê eserê ey est ê. Şîîr û nuşteyê ey bi ziwananê bînan zî ameyê açarnayene.
Kurdkî tarîx de zaf şikitişan ra vîyarta zî, şîîra aye sey kokêko ke vîrê çekuyan paweno, tim payra menda. Okuducî bi kitabê xo hem rêçeşîîra kurdkî ya newîye taqîb keno hem zî manayanê ziwanî yê aşkera û nêaşkerayan ser o vindeno. Coka no kitab tehqîqatêkê şîîrî ra zêdeyêr, şahidîya têkoşînê estbîyayîşê ziwan û hunerî keno.
Okuducîyî derheqê kitabê xo de wina vat: “No eser bi keda 5 serran ame hedrekerdiş. No ne rêz o, ne peynî; destpêkêk o. Mi nesla Hawarî ra dest pêkerd; dîwananê Seyda Cegerxwînî ra heta nesla Kovara Tîrêjî şîya. Bêguman şaîrê demê ma zî tede yê. Esas de no kitab seba rexne, erjnayîş û şîroveyê şîîra kurdkî eserêko verên o. Ez hêvî kena ke no kitab nuştoxan rê ke do bêrê, edebîyatê kurdkî rê, ewil zî şîîra ma rê bibo çimeyêk.”
Çayan Okuducî qezaya Farqîn a Amedî de ameyo dinya. Heta nika 7 kitabê ey yê kirdaskî û tirkî weşanîyayê.
