Berhema nû ya nivîskar Çayan Okuducî ya bi navê “Dengê Helbesta Kurdî” ji aliyê Weşanxaneya Lîsê ve hate çapkirin. Ev pirtûk di encama xebateke 5 salan de der çûye. Pirtûk balê dikişîne ser pêşveçûna helbesta Kurdî û rola wê ya di avakirina nasname û ziman de.
Pirtûkek din jî li bîra wêjeya Kurdî zêde bû. Ev pirtûka nivîskar Çayan Okuducî ya bi navê “Dengê Helbesta Kurdî” ye. Pirtûk ji Weşanxaneya Lîsê der çû.
Berhem li ser helbesta modern yên Kurdî analîzan pêşkêşî xwîneran dike. Ji Seydayê Cegerxwîn heta roja me ji helbestkarên Kurd li ser berhemên wan nirxandin û analîzên hurgilî pêşkêş dike. Çayan Okuducî helbestkarek û nivîskarek du zimanî ye. Bi berhema xwe ya dawî re di wêjaya Kurdî de sê berhemên wî hene. Helbest û nivîsên wî bo zimanên biyanî hatine wergerandin. Pirtûk ji 190 rûpelan pêk tê.
Şahidiya têkoşîna hebûnê ya ziman û hunerê dike
Çendî Kurdî, di seranserê dîrokê de bi gelek şikestinan re rû bi rû mabe jî, lê helbesta wê mîna reheke parêzvanê bîra peyv û gotinê her li ser pêyan maye. Çayan Okuduci bi ‘Dengê Helbesta Kurdî’ hem dide dû şopa helbesta Kurdî ya nûjen hem jî serê xwe bi wateyên diyar û nediyar ên zimên diêşîne. Û ji pencereya ku helbest ji peyvê biwêdetir e û pira di navbera rabirdû û dahatûyê de ye, tenê xwendevanan ber bi lêhûrbûna li ser helbestê bi rê nake, dike ku xwendevan bi bîra kûr a di helbestê de hevrû bibe. Lewma ev pirtûk, ji lêkolîneke li ser helbestê biwêdetir, şahidiyeke zexm li têkoşîna hebûniyê ya zimên û hunerê dike.
‘Dengê Helbesta Kurdî’ geşteke ber bi kûrahiya helbesta Kurdî ya nûjen ve ye. Ew, bes wekî awayekî estetîk nêzî helbestê nabe. Wekî hilgirê bîrê, nasname, berxwedan û vîna hebûniyê li ser helbestê hûr dibe.
Nivîskar 5 sal ked daye pirtûkê
Çayan Okuducî derbarê pirtûka xwe de vê yekê aniye ziman: “Xebatek bi keda 5 salan hatiye honandin. Ne rêz ne dawî ye destpêkek e. Ji nifşê Hawarê min dest pê kir, ji dîwanên Seyda Cegerxwîn bi ber nifşê Kovara Tîrêjê ve. Bêguman helbestkarên serdema me. Di esase xwe de ev pirtûk bo rexne, nirxandin û şîroveya helbesta Kurdî berhema ewîl e. Di pirtûkê de berfirehî û li ser rêza analîz û vekirina risteyan tevgeriyam. Hêvî dikim ev pirtûka li ber destê xwîneran e ku bên nivîsandin li ser esmanê wêjeya Kurdî bi taybetî li ser helbesta me ji siberojê û roja me re bibe çavkaniyek.”
Çayan Okuducî li navçeya Farqînê ya Amedê ji dayik bûye. Nivîskar û helbestkarek du zimanî ye. Heta niha 7 pirtûkên wî yên bi Kurmancî û Tirkî hatine weşandin.
