Refîqa Nergize ke hîrê lajê aye Têkoşînê Azadîya Kurdîstanî de şehîd bîyî, vat: “Wa êdî zerrîya tu dayîke nêveşo. Hîrê lajê mi şehîd bîyî, her hîrê zerrîya mi de ciwîyenê. Ez bi înan sereberz a.”
Seba şervananê azadîye yê ke şehadetê înan demo peyên de ame eşkerakerdene, zaf bajaranê Kurdîstan, Tirkîya û Ewropa de tazîye û yadkerdişî yenê viraştene. Rojgirav Amed (Mursel Nergiz) ke 13ê adare 2020î de Metîna de şehîd bî, tazîyeya Amedî de ame vîrardene. Maya ey Refîqa Nergize ke lajê aye yê bînî Felat Amed (Yuksel Nergiz) û Îlhan Amed (Tariq Nergiz) zî şehîd bîyî, vat ke a bi hîrê lajanê xo sereberz a û heme keyeyan, gerîlayanê Kurdîstanî û Rayber Apoyî rê serweşî waşte.
‘Înşalah naye ra dima haştî bena û keyeyî resenê gedeyanê xo’
Nergize vat: “Verê Îlhan şi, badê şehadetê ey Felat şi, verê şehadetê Felatî zî Rojgirav şi. Rojgirav verê şîyayîşî ez dewe ra veng daya Amed û mi ra vat ke ez şina. Verê ney o nêzdîyê 40 rojî hepisxane de bîbî û îşkenceyêka girane dîbî; ey vat ‘Mi soz dayo, ez êdî tîya de nêmanena, ez nêeşkena reyna bikewa hepisxane. Mi qerarê xo dayo, ez şina.’ Mi vat ‘eke rasta zî ti şinî, ez to oxir kena.’ Ma 15 rojî pîya mendî; ey heme nêzdî û embazanê xo ra vat ‘ez şina teberê welatî’, la mi ra vatbî ke o şino koyan. Şîyayîşê lajê min ê hîrêyinî zî mi rê giran ame, la mi bi destê xo o oxir kerd. Wexto ke ez zîyaretê ey ra agêraya û pîyê ey ra rewşa ey vat, ey a roje gonî eşte mezgê ey û 3 rojî dima Amed de cuya xo ra bî. Nêzdîyan persa ke ma dewe de tazîye ronê; mi vat ney, lajê mi embaz û komelê xo ra zaf hes kerdêne, ma tazîyeya ey embazanê ey reyde ronanê. Wa êdî zerrîya tu dayîke nêveşo. Hîrê lajê mi şehîd bîyî, her hîrê zerrîya mi de ciwîyenê. Înşalah naye ra dima haştî bena û keyeyî resenê gedeyanê xo.”
