Endamê Konseya Rayraberdişî ya KCKyî Mustafa Karasuyî vat ke ganî Rayber Apo prosesî de rolêko çalakêr bigîro, fikrê ey rasterast biresê raya pêroyî û proses şefafêr aver şêro: “Prosesêko ke bi azadîya Rayber Apoyî temam nêbo, nêqedîyeno.”
Mustafa Karasuyî persanê Medya Haberî yê rojdemî rê cewab dayî û derheqê Prosesê Haştî û Komelê Demokratîkî, qanûnê çarçewa, rolê Rayber Apoyî, Festîvala Kulturî ya Kurdan, munaqeşeyanê elewîyan û ameyoxê êzîdîyanê Şingalî de nirxnayîşî kerdî.
Karasuyî şehîdê 14ê temmuze Kemal, Hayrî, Akîf û Alî û 10 embazê ke êlule de Zîndanê Amedî yê Hûmare 5. de ameyî qetilkerdene, bi hurmet ardî vîrî û vat ke wayîrvejîyayîşo pêt ê şarî yê yadkerdişanê şehîdan û beşdarîya girseyî ya Festîvala Kulturî ya Kurdan, wayîrvejîyayîşê prosesî mojneno: “Keyeyê şehîdan û şarê ma wazenê ke têkoşînê şehîdan bi haştî û çareserîya demokratîke biqedîyo. No wayîrvejîyayîş qewetêko gird dano Rayber Apoyî û dewleta tirke rê zî mesaj dano ke rastîyêka kurdan est a û ganî bi na rastîye reyde çareserî bêro dîyene.”
La eke destpêk o, ganî gamê neweyî bêrê eştene
Karasuyî vat ke qanûnê çarçewa problemin o la destpêkêk o: “Meclîs de reya verêne behsê meseleya kurdan û girêdayîşê ci yê demokratîkbîyayîşî bî. La eke destpêk o, ganî gamê neweyî bêrê eştene. Prosesî tena bi bêçekbîyayîşî sînordarkerdiş, yanî nêzdîbîyayîşo asayîşî, no qanûn sey destpêk nêdîyene; xora seba nê nêzdîbîyayîşî mesele heta ewro çareser nêbîye. Rayber Apo, îdarekar û hûmarêka muhîme ya qadroyanê ma mîyanê qanûnî de nîyê; no problemêk o. Ma vato ke nê prosesî Rayber Apo rameno; no proses do binê însîyatîf û rayberîya ey de bo.”
Ganî şertê weşî û asayîşê Rayber Apoyî bivurîyê
Karasuyî ard ziwan ke badê qanûnî ganî Rayber Apo bi xo bikewtêne dewre, la aşmêk vîyarta û taloqkerdiş est o: “Ganî Rayber Apo komelê Tirkîya û kurdan rê veng bido, çapemenî, roşnvîr û qewetanê demokrasîye reyde bêro têhet; wina spekulasyon û provokasyonê vera prosesî zî vernî gênê. Heqê Hêvîye ke momentumê destpêkî yê prosesî bî, hema nêkewto dewre. Ganî şertê weşî û asayîşê Rayber Apoyî bivurîyê, o bireso şertanê cuye û xebata azade û no bi azadîya ey temam bibo. Prosesêko ke bi azadîya Rayberîye temam nêbo, nêqedîyeno; no qetî yo.”
‘Tîje bi herre nêyena sîwaxkerdene’
Karasuyî derheqê beyannameyê 53 kesan ê bi nameyê “roşnvîranê elewîyan” de vat ke no sabotajê prosesî yo: “Nêmeyê elewîyan kurd ê; nêzdîyê 10 hezar ciwanê elewî nê têkoşînî de şehîd bîyî. Tirkîya de têkoşîno tewr gird ê azadîya bawerîya elewîyan hereketê ma dayo; bi saya têkoşînê ma elewî bîyî asayox. Ez bi xo sey ciwanêkê kurdê elewî tewrê nê têkoşînî bîya; Çubuk de ronayoxanê şeşan ê Apoyîtîye ra çar ciwanê kurdê elewî bîyî. Nêzdîbîyayîşo winasî vera hereketê ke seba azadîya bawerîya elewîyan piştîya tewr girde daya, xayinîya elewîyan rê. Vanê ‘tîje bi herre nêyena sîwaxkerdene’; beyannameyê înan sey nuşteyo ke awe ser o nusîyayo yo. Şadîker o ke dezgehê elewîyan û nuştox Mehmet Bayrakî tepş girewt û vat ke nê kesî elewîyan temsîl nêkenê; ez înan pîroz kena.”
‘Wexto ke DAÎŞî hêriş Êzîdîyan kerd, gerîlayê ma bi fedakarî vazdayî şîyî Şingal’
Karasuyî derheqê kombîyayîşanê hukmatê Iraqî yê derheqê Şingalî de vat ke ê sey wendekaranê Rayber Apoyî derheqê êzîdîyan de hesas ê: “Êzîdî 74 fermanan ra vîyartî; wexto ke DAÎŞî hêriş kerd, pêşmerge û artêşa Iraqî ê ca verdayî, gerîlayê ma bi fedakarî vazdayî şîyî Şingal. Coka mîyanê êzîdîyan de sempatîya Rayber Apoyî est a. Rayber Apo uca zî entegrasyono demokratîk wazeno. Nika war vurîyayo, têkilîyê PDKyî sey verê nîyê; nê warî de ganî çareserî bibo. Xoîdareyê êzîdîyan ê bingeyê demokrasîya herêmkî û qewetêko xopawitişî yo herêmkî yo ke girêdayeyê artêşa Iraqî yo, çîyo tewr rast û mentiqî yo; no Iraqî pêt keno. Ma bawer kenê ke peynî de fehmo rast ser keweno.”
