Mazlum Ebdî ku pirsên Rojnameya Yenî Yaşamê bersivandin, destnîşan kir ku piştî 15 salên şer û bedelên giran, armanca wan a sereke parastina destkeftiyan e û wiha got: “Eger Sûriye ji nûve tê avakirin, divê Kurd di vê avakirinê de bi nasnameya xwe cih bigirin û mafên xwe garantî bikin.”
Têkildarî pêşketinên li Sûriyeyê Mazlum Ebdî ji bo rojnameya Yenî Yaşamê pirsên Nezahat Dogan bersivandin. Abdî balkişand ser geşedanên li Rojhilata Navîn û anî ziman ku di pêvajoya avakirina Sûriyeya nû de, divê gelê Kurd di qada siyasî û rêveberiyê de cihê xwe yê mafdar bigire. Ebdî destnîşan kir ku piştî 15 salên şer û bedelên giran, armanca wan a sereke parastina destkeftiyan e û wiha got: “Eger Sûriye ji nûve tê avakirin, divê Kurd di vê avakirinê de bi nasnameya xwe cih bigirin û mafên xwe garantî bikin.”
‘QSD tasfiye nebû vegeriya beşek fermî ya artêşa Sûriyeyê’
Li ser nîqaşên derbarê entegrasyona Hêzên Sûriyeya Demokratîk (QSD) de, Ebdî angaştên wekî “QSD tasfiyebûye” an jî “tiştek netiye guhertin” red kirin. Ebdî diyar kir ku ev pêvajo li ser bingeha mutabeqet û planeke zelal pêk hatiye û wiha axivî: “Hêza me ku 15 salan parastina van axan kir, niha bi awayekî fermî tevlî artêşa Sûriyeyê bûye. Armanca me ew e ku parastina herêmê û gelê xwe di çarçoveyeke nû û fermî de bidomînin.”
‘Pirsgirêka zimanê zikmakî ji bo me xeta sor e û têkoşîna me dê bidome’
Di mijara perwerdeya bi zimanê Kurdî de, Ebdî da zanîn ku di dîroka Sûriyeyê de yekem car e zimanê Kurdî di nava perwerdehiyê de bi awayekî fermî cih digire. Ebdî destnîşan kir ku ev gava hatî avêtin ji bo wan bes nîne û wiha domand: “Zimanê Kurdî xeta me ya sor e. Tevî ku statuya ziman hatiye qebûlkirin jî, li gorî sîstema ku me di van 15 salên dawî de ava kiribû hîn kêmasî hene. Ji bo mafên çandî û perwerdehiya zimanê zikmakî têkoşîna me dê bi biryarî bidomîne.”
‘Ji bo Efrîn û Serêkaniyê xebat tên meşandin”
Ebdî bal kişand ser rewşa herêmên wekî Efrîn û Serêkaniyê û diyar kir ku ji bo vegera ewle ya koçberan û çareserkirina pirsgirêkên asayişê hewldanên wan berdewam in. Ebdî da zanîn ku ji bo parastina mafên gelê Kurd li hemû herêman, ew bi rayedarên Sûriyeyê re di nava diyalogê de ne û armanca wan ew e ku ewlehî û aramî ji bo hemû pêkhateyan bê misogerkirin.
‘Pêwendiyên bi Tirkiyeyê re û pêvajoya nû li gorî berjewendiya gelan e’
Di derbarê têkiliyên bi Tirkiyeyê û bandora wê ya li ser herêmê de, Ebdî destnîşan kir ku piştî salên şer, niha zemîneke ji bo diyalog û çareseriyê derketiye holê. Ebdî anî ziman ku ew girîngiyê didin têkiliyên asayî û avaker ên bi Tirkiyeyê re û wiha pêde çû: “Têkiliyên ku bêşer û li ser bingeha diyalogê bên meşandin, dê hem ji bo Sûriyeyê hem jî ji bo gelê Kurd encamên erênî bi xwe re bînin.”
‘Divê Kurd yekîtiya xwe ava bikin û bi bawerî ber bi pêşerojê ve bimeşin’
Ebdî di dawiya axaftinê de banga yekîtiyê li hemû hêzên siyasî û gelê Kurd kir û bal kişand ser girîngiya xurtkirina têkoşîna demokratîk. Ebdî got ku êdî rûpelê şer hatiye girtin û dem dema avakirinê ye û wiha got: “Pêwîst e gelê me û hemû pêkhateyên Sûriyeyê bi hêviyeke mezintir li pêşerojê binêrin. Bi yekîtî, rêxistinbûn û têkoşîneke hevpar em dikarin siberojeke azad û demokratîk ava bikin.”
