Şêwirmendê Serokwezîrê Iraqê yê ji bo Karûbarê Ewlekariyê pêşwazî li Balyozê Tirkiyeyê yê li Bexdayê kir û her du aliyan guhertinên siyasî û ewlehiyê yên dawî û bandora wan a li ser aramiya herêmê gotûbêj kirin.
Ofîsa Ragihandinê ya Şêwirmendê Serokwezîrê Iraqê Qasim Erecî, derbarê hevdîtina Qasim Erecî û Balyozê Tirkiyeyê yê li Iraqê Anil Bora Inan de daxuyaniyek weşand. Di daxuyaniyê de hat diyarkirin ku îro Qasim Erecî ligel Balyozê Tirkiyeyê Anil Bora Inan civiya ye. Di rûniştinê de têkiliyên dualî yên navbera Iraq û Tirkiyeyê û rêyên xurtkirina hevkariya hevpar a di warên siyasî, ewlehî û aborî de hatin nirxandin.
Di hevdîtinê de, Erecî bal kişand ser giringiya zêdekirina hewildanên dualî, yekxistina helwestan û pevguhartina agahiyên îstîxbaratî û ewlehiyê daku ev yek bibe bingehê xurtkirina ewlehiya Iraq, Tirkiye û tevahiya herêmê.
Hate gotin ku Balyozê Tirkiyeyê jî daxwaza welatê xwe ya ji bo pêşxistina têkiliyên ligel Iraqê yên di warên siyasî, aborî, bazirganî û sermayeguzariyê de anî ziman. Her wiha di civînê de giringiya xebata hevpar û kûrkirina hevkariya navbera her du welatan hat destnîşankirin.
