Mustafa Karasuyî ard ziwan ke munaqeşeyê ke derheqê zabitnameyanê Îmrali de yenê rayraberdene, zemînê provokasyonan afirnenê û vat seba ke verê nê bêro girewtene, ganî Rayber Apo şarî reyde bi xo temas rono.
Endamê Konseya Rayraberdişî ya KCKyî Musatafa Karasuyî ke programê taybetî yê Medya Haberî de cewab da persanê rojnameger Erdal Erî, deheqê rojdemî de erjnayîşê muhîmî kerdî.
Karasuyî îfade kerd ke bi qanûnê çarçewa ke meclîsî ra vîyart, meseleya kurdan nîna çareserkerdene la no destpêkerdişêk o û vat derheqê rewşa Rayber Apoyî de pêvînayîşî dewam kenê. Karasuyî reyna ard ziwan ke heta ke Rayber Apo dewre nêkewo proses nêeşkeno bêro averberdene û vat, “Rayberîye ganî bi xo prosesî rayra bêro. Eke çek yeno ronayene, no zî ganî hetê Rayberîye ra bêro rayraberdene. Wina nêbeno yanî, hadî çeke ronê, bêrê. Wina yew çî nêbeno. Ma qala wina çekeronayîşî nêkenê. Eke Tirkîya rê agêrayîş beno, ma wazenê ûca têkoşînê sîyasîyî demokratîkî rayra bêrê.”
Karasuyî îfade kerd ke qanûn de hend ca nêdîyayo Rayber Apo û rayberanê têgêrayîşî û vat ê qanûnî red nêkenê la ganî ronayîşê çekan û gamê demokratîkbîyayîşî pîya bêrê destgirewtene. Karasuyî vat, “Cade bi nê qanûnî meseleya kurdan nîna çareserkerdene la no qanûn ganî çarçewa de bi ke bieşko verê çareserîya meseleya kurdan abikero. Bi caardişê qeraranê Mehkemeya Heqanê Merdiman a Ewropa û Mehkemeya Qanûnê Bingeyî prosesî rê do paştdayîşo komelkî bizêdîyo.”
Karasuyî nê vatî: “Bêçekkerdiş têna bi ronayîşê çekan nêbeno. Îdarekarî û bi seyan kesan teberê çarçewa de mendî. Ganî na babete bêro safîkerdene. Ma wina yew têgêrayîş nîyê. Ma îradeyê xo nêbenê tay kampan de sînordar nêkenê, têgêrayîşêko binê kontrolî de yo, nîyê. Ma wazenê meseleya kurdan çareser bikerê. Ma wazenê şirê Tirkîya sîyaseto demokratîk bikerê.
Înanê ke zabitnameyê Îmrali medyaya sanale de vila kerd, vera proses ê. No vera prosesî provokasyonêk o. Seba ke verê spekulasyonanê winayênan bêro girewtene, ganî Rayber Apo bieşko rojnameger, roşnvîr, û rayapêroyî reyde pêvînayîş bikero. Ganî bêrê Îmrali bêrê akerdene û her kes bieşko Rayber Apoyî reyde pêvînayîş bikero.”
Karasuyî îfade kerd ke mabênê dewlete û têgêrayîşî de pêvînayîşî benê û vat: “Rayber Apoyî reyde pêvînayîşî yenê kerdene. Derheqê rewşa Rayberîye de pêvînayîşî dewam kenê. Mabênê dewlete û Rayberîye de pêvînayîşî est ê. Mabênê ma û dewlete de zî kanalî est ê. Derheqê rewşa Rayber Apoyî de dewlete reyde pêvînayîşî dewam kenê. Heta ke Rayber Apo dewre nêkewo proses aver nêşino. Ma pawenê mabênê têgêrayîş û Rayber Apoyî de rî bi rî pêvînayîşî bêrê kerdene.”
Karasuyî ard ziwanke netîceya têkoşînê 50 serran de şarê kurdî de zanayîş û tecrubeyo pîl ame afirnayene û vat ê do prosesî şarî reyde aver bêrê.
Karasuyî ard ziwan ke derheqê prosesî de hasasîyetê şarî est ê û vat, “Ma çi bikerê, ma do pîya bi nê şarî bikerê. Ma do bi paştdayîşê şarî bikerê.”
Karasuyî veng hêzanê demokratîkan ê Tirkîya ke wa aktîf tewrê prosesî bibê û vat bi çareserkerdişê meseleya kurdan Tirkîya eşkana bibo demokratîke.
Karasuyî îfade kerd ke vîrameyîşê gerîlayan ke şehadetê înan demê peyênî de eşkera bîyî, Prosesê Haştîya û Komelê Demokratîkî ra cîya nîyê û vat keyeyê şehîdan haştîye, azadîya Rayber Apoyî û serkewtişê prosesî wazenê.
Karasuyî ard ziwan ke Festîvala Kulturê Kurdan a Ewropa pîya bi têkoşînê ziwan, kultur û nasnameyî parçeyêkê Prosesê Haştîye û Komelê Demokraîtkî ya û seba tewrbîyayîşê festîvale veng da ke 5ê êlule de do Dortmund de bêro kerdene.
