KJARî vat: “Şorişê ‘Jin, Jiyan, Azadî’ tena waştişêko demkî yan zî cewabêko vera zulmê rojaneyî nîyo; eynî wext de şorişêko fikrî û tarîxê têkoşînê şaranê Îranî de neweyîyêka tarîxî ya raştikên a.”
Komela Cinîyanê Azadan a Rojhelatê Kurdîstanî (KJAR) bi wesîleyê serrgêra 4. ya şorişê “Jin, Jiyan, Azadî” eşkerayîyêka nuştekî daye:
“Şorişê ‘Jin, Jiyan, Azadî’ ra çar serrî vîyartî. Têkoşînê çar serran ê bêqutbîyayîşî îsbat kerd ke no hereket, verê vurîyayîşêk awanîya sîyasî de, ruh û bawerîya komelî de vurîyayîşo tewr xorîn viraşt. Wexto ke komelêk tamê azadîya fikrî bigîro, tu hêz nêeşkeno ey peyser bero.
Cinî merkezê nê hesabî de ya; tena sey cinsîyetêk ney, sey sembolê şerefê merdimîye û gandarbîyayîşê cuya azade. No têkoşîn serewedartişêko demkî vîyarto û bîyo parçeyêko nêabirnayox ê cuya rojane.
Komara Îslamî ya Îranî û tayê hereketê teberê welatî destê xo dayî pê ke manaya nê hereketî asaye bikerê. Rejîmo serdest bi vilakerdişê şîdetê rêxistinkerde, feqîrîya organîze û awankerdişê torranê mafya cehd kerd ke rijîyayîşê exlaqî yê komelî temîn bikero û îradeyê cinîyan bişikno. La cinîyê ke tamê şûurî girewto, qet game peyser nêerzenê.
Cinîyan rayîrê têkoşînê vera pêçeyê zorî de cehdêko gird kerd û destkewteyî girewtî. La heme amancê şorişî vetişê pêçe ser ra nêbî; amanc hewanayîşê pêçeya bi zorî zîhn, îrade û estbîyayîşê cinîyan ra bî û no têkoşîn hema zî dewam keno.
Tedaya çar serran, pêla îdamî ya hîraye, tepiştişê girseyî, qirkerdiş û zewicnayîşê bi zorî yê gedeyan fikrê azadîye nêrijnayî. Serra vîyarte de wexto ke çimî şerê mabênê Amerîka, Îsraîl û Îranî ser o bî, şerêko tewr gird zereyê welatî de vera komelî, bitaybetî vera cinîyan ame rayraberdene. Hûmara cinîyanê tepişteyan û qeraranê îdamî zêde bena; halê Zeyneb Celalîyan, Werîşe Muradî, Pexşan Ezîzî, Gulrox Îraî û tepişteyanê bînan her roje xem virazeno. Muhîtêk de ke rejîm îstatîstîkanê sûcanê xo înkar keno, weşanayîşê nê datayan erkê rêxistinanê heqanê merdiman o.
Cinîyê têkoşerî yê Îranî çar serrî yo bê vindertiş têkoşîn danê. Xoverdayîşêko wina serkewtişê tewr gird ê vera rejîmêko camêrdserdest o. Seba resayîşê cuyêka azade xeylê merdimanê erjîyayeyan ganê xo da; vîrê înan meşaleya nê rayîrê şorişî ya. Coka serrgêra nê şorişî peynîya demêk nîya; newekerdişê sozêko pêt ê dewamê têkoşînî ya.
Ma demêk de yê ke Îran de cinîyî asta tersî ra vîyartî. Fikrê azadîye ame dinya û hêzê îqtîdarî nêeşkena ey birijno; çunke cinî destûr nêdanê ke manaya nê şorişî bêro şiknayene. No têkoşîn do bi gamanê hîna pêtan dewam bikero heta ke azadîya temame, edalet û komelêko demokratîk û seypêyîwaz bêro awankerdene.
Ma sey KJARî bawer kenê ke felsefeya ‘Jin, Jiyan, Azadî’ ya ke bi serran o Kurdîstan de yena ciwîyayene, êdî taybetmendîyêka zafneteweyî girewta û xeylê cinî ardî têhet. Coka ma serrgêra nê şorişî de pîya bi yew vengî vajê ‘Jin, Jiyan, Azadî’ û seba resayîşê hedefanê xo hîna rêxistinkerde hereket bikerê.
Programê ke bi wesîleyê serrgêra şorişî do bêrê pêşkêşkerdene, rojanê ameyoxan de do bêrê parekerdene.”
