Konservutuvarê Şaristanî yê Aram Tîgranî de ke Şaredarîya Amedî ya Şaristanê Girdî, badê ke îdareyê qeyûmî ci girewtbî, 9 serrî dima newe ra dekerdo falîyet, qeydê demserra newîye dest pêkerd. Muracatê beşanê sînema, tîyatro, muzîk, muzîkê gedeyan, ziwan û edebîyatê kurdkî û govende do mabênê 1-20ê êlule de DÎSMEK’î ser o bêrê kerdiş.
Şaredarîya Amedî ya Şaristanê Girdî, bi amancê pawitiş, averberdiş û neqilkerdişê kulturî û hunerî yê neslanê neweyan rê, xebatanê xo dewam kena. Konservutuvarê Şaristanî yê Aram Tîgranî ke binê banê Serekîya Daîreya Kultur, Huner û Karanê Komelkîyan de falîyet keno, do seba demserra perwerdeyî ya newîye wendekaran qebûl bikero.
Konservutuvarê Aram Tîgranî ke serra 2010î de ame ronayîş, 1ê teşrîna peyêne ya 2016î de hetê îdareyê qeyûmî ra ke şaredarî rê ameybî tayînkerdiş, ame girewtiş. Konservutuvar hetê Şaredarîya Şaristanê Girdî ra badê 9 serran newe ra debî falîyetî û heskerdoxanê hunerî reyde ame têhet.
Şeş beşan de perwerdeyo bêpere
Konservutuvarê Şaristanî yê Aram Tîgranî ke do bi kontenjanêko sînordar wendekaran qebûl bikero, binê banê xo de do beşê sînema, tîyatro, muzîk, muzîkê gedeyan, ziwan û edebîyatê kurdkî û govende bigîro. Bi bernameyanê perwerdeyî yeno amanckerdiş ke prosesê berhemardişê hunerî yê beşdaran bêro piştîdayîş û kultur neslanê neweyan rê bêro neqilkerdiş.
Dersê atolyeyan ê konservutuvarî pêro do Merkezê Kultur û Kongreyî yê Çand Amedî de bêrê kerdiş.
Beşê muzîkê gedeyan de perwerde do 6 serrî dewam bikero
Gedeyê emrê 7-12 serrî do beşê muzîkê gedeyan ra feyde bigîrê. Beşî de ke ziwanê perwerdeyî do kurdkî bo, gedeyan rê do 6 serrî perwerdeyê muzîkî bêro dayîş. Bi bernameyê perwerdeyî yo demderg yeno amanckerdiş ke qabîlîyetê gedeyan ê warê muzîkî emrêko şenik de bêrê eşkerakerdiş û bi prosesêkê perwerdeyî yo sîstematîk bêrê averberdiş.
Muracatî DÎSMEK’î ser o yenê girewtiş
Muracatê demserra newîye do mabênê 1-20ê êlule 2026î de adresa https://dismek.diyarbakir.bel.tr/ ser o bêrê kerdiş. Teberê Amedî ra zî do muracat bêro qebûlkerdiş. Kesê ke wazenê derheqê şertanê muracatî û bernameyanê perwerdeyî de agahîya bidetaye bigîrê, do telefonê 0412 502 90 18î ser o wezîfedaran reyde têkilî ronê.
Atolyeyê weçînayîşê wendekaran do 21ê êlule de dest pêkerê
Badê temambîyayîşê muracatan, atolyeyê weçînayîşê wendekaran do mabênê 21-27ê êlule de Merkezê Kultur û Kongreyî yê Çand Amedî de bêrê kerdiş. Badê erjnayîşanê ke atolyeyan de do bêrê kerdiş, wendekarê ke heqê perwerdegirewtişî qezenc kenê do bêrê dîyarkerdiş.
Netîceyê atolyeyanê weçînayîşê wendekaran do 5ê teşrîna verêne de bêrê eşkerakerdiş. Dersê demserra newîye yê Konservutuvarê Şaristanî yê Aram Tîgranî do 12ê teşrîna verêne de dest pêkerê.
