Parlementer Newroz Ûysal Aslan di Nobeta Aştiyê ya ÎHDê de got ku aştî bi gavên hîqûqî dê mîsoger bibe.
Nobeta Aştiya Civakî û Biratiyê ya şaxa Komeleya Mafên Mirovan (ÎHD) a Şirnexê di hefteya 11emîn de li Parqa Kamîl Acûn a navçeya Hezexê ya Şirnexê bi tevilbûna Parlementera DEM Partiyê ya Şirnexê Newroz Ûysal Aslan, endam û rêveberên partiyên siyasî, saziyên civakî û gelek welatiyan hat lidarxistin. Di destpêka nobetê de Hevserokê Şaxa ÎHDê yê Şirnexê Şivan Sakman derbarê armanca nobetê de agahî dan û got: “Pêvajoya Aştî û Civaka Demokratîk ji bo aştiyê hêviyên gelekî mezin bi me derxist holê.”
Piştî Şivan Sakman, Parlementer Newroz Ûysal Aslan derbarê Pêvajoya Aştî û Civaka Demokratîk de got ku çarçove qanûna were amadekirin tenê destpêkeke û wiha axivî: “Ev qanûn ne encamek bi dawî ye, ev qanûn destpêka qanûnên were amadekirin e. Em hêvî dikin ev gav li gor ruhê pêvajoyê werin avêtin, ji ber ku aştî encax bi hiqûqê dikare mîsoger bibe. Em hêvî dikin ev nobet bibe wesîleya aştî, biratî û wekheviyê.”
Endama Meclîsa Dayîkên Aştiyê ya Hezexê Medîha Akay jî bal kişand ser azadiya Rêberê Gelê Kurd Abdullah Ocalan û wiha got: “Heya Rêberê me azad nebe em nikarin qala aştiyek rasteqîn bikin. Rêbertiyê 27ê sibata 2025an bangek kir û ji wê rojê heya îro çavê dayîkan li rêya zarokan wan e. Em bi Serokê xwe û gerîlayên xwe bawer in û divê dewlet tişta dikeve ser êdî bike.
Nobet bi nirxandinên beşdaran yên li ser Pêvajoya Aştî û Civaka Demokratîk bi dawî bû.
